Уулзалт 2. Содномзундуйн Эрдэнэд нэг алхам ойртов.

Амралтын өдөр миний харилцуурт чухал дуудлага ирсэн нь өнөөх “Өөр Нэг Хүн” манай гадаа ирснээ дуулгасан хэрэг. “Уурын зуухны асуудалтай хүн мөн үү?” гэхэд нь би “Тийм ээ” гэж хариулахдаа “Асуудал нь би биш юмсан” гэж бодож амжив. Энэ хавийн улсууд нэгнийгээ учир битүүлгээр “Тэр хүн”, “Өөр Нэг Хүн” гэх мэтээр ярьдаг нь ер бусын хөндий. “Өөр-Нэг-Хүн” намайг нэрээр минь дуудсангүй…

Шинээр орж ирэгсдэд танилцуулга

Содномзундуйн Эрдэнэ миний гэрийн хаяанаас 30 тохой зайд, нүүрсээр ажилладаг уурын зуух барьсан нь намайг хохироож байгаа юм. Үүнийг би хэлэлцээрийн замаар шийдвэрлэхээр оролдож буй. Бэлтгэл ажлын хүрээнд, Содномзундуйн Эрдэнийн Ашиг Сонирхол ба Өөрийн Ашиг Сонирхолыг нэгтгэж, шийдэлд хүрэх холбоосуудыг олохыг хичээснийгээ “Ашиг Сонирхолын Карт”-д тусгасан. Талуудын Ашиг Сонирхолыг хангах замаар тохиролцоонд хүрэх нь цорын ганц шийдэл гэж үздэг нь миний баримталж буй арга барилын онцлог юм. Би түүний, тэр миний ашиг сонирхолыг авч үзэх учиртай юм.

30 тохой

Энэ сайт хүч-чадал, эрх мэдэл сорьсон зөрчил-тэмцэлийг биш харин ойлголцол, харилцан хүндлэлийн зарчмыг баримталдаг хэлэлцээрийн соёлыг таниулах зорилготой. eduCase-н гол дүр нь олны танил, энэ улсын тэргүүлэх улстөрчдийн нэг Содномзундуйн Эрдэнэ байгаа нь тохиолдлын бас завшаантай хэрэг. Уншигч таны хувьд иргэн Энхтөр, төөр тэр өндөрлөгт буй Содномзундуйн Эрдэнэтэй тохиролцоонд хүрэх эсэх нь сонирхолтой байж мэдэх юм. Энэ бол “энгийн иргэн”, энэ улсын тэргүүлэх улстөрчийг хүмүүжүүлэхээр шамдаж буй онцгой оролдлого шүү. Юутай ч миний оролдлого, хүч үл хэрэглэх хэмээгч энэ хүчирхэг хэрэгслийг судлах сэдлийг танд төрүүлнэ гэж найдна.

Асуудлыг хүчээр шийдэх нь өс хорсол, гомдол, хохирол дагуулдаг бол Хэлэлцээрийн ухаан сайн дурын тохиролцоонд ойлголцол, харилцан хүндлэлийн замаар хүргэдэг.

Gelenwagen

Манай үүдэнд зогсох хар өнгийн Gelenwagen-ийг хараад, “Содномзундуйн Эрдэнэ асуудлыг шийдүүлэхээр над руу нэг ТОМ бизнесмен илгээж” гэх бодол зурсхийлээ. Асуудал амархан шийдэгдэх нь!

Gelenwagen гэдэг нь Land 200-с хоёр дахин үнэтэй, дээд зэрэглэлийн luxury ангилалын G-Class Mercedes Benz машин юм. Энэ унааг харсан гадна дотны хэн боловч эзний сүр хүчийг шууд ойлгоно. Гайхалтай техник…

Би найрсаг царай тодруулан түүнийг гэртээ оруулан гутлыг нь тайлуулж, зочны өрөөний ширээнд суулгав. Худалдаачид боломж нь байвал үйлчлүүлэгчийнхээ хажууд эсвэл зэргэлдээ суудалд суудаг, эгц өөдөөс харалцах нь дайнч ур амьсгалыг бий болгодог.

Энэ бол намхавтар, мярайлаг, “төв” царайтай, 30 орчим насны залуу байлаа. Өөрт нь арай ахадсан уу гэмээр эрхэмсэг төрх зүүсэндээ түүртсэн шинж алга.

Эрдэнийн хүү Одбаяр

“Кофе юу, жүүс үү?” гэж намайг асуухад тэрээр “Үгүй, үгүй” гээд, амандаа хэдэн юм бувтанасныг би ялгаж сонсож чадсангүй. Түүний өмнө манайхыг “судалсан” Баярсайхан аягалж өгсөн кофе-г ууж дуусгаад, “Сайхан кофе байна” гэж хэлээд гарсан бол, энэхүү “Өөр Нэг Хүний” татгалзсан хариу надад ёозгүй бодол төрүүлсэн юм. Энэ хүн хэлэлцээрт чин сэтгэлээсээ оролцохгүй нь…

Яриа эхлэв.

Энхтөр:Баярсайхан танд манай байдлыг ярьсан байх?”

Өөр Нэг Хүн: “Би түүнтэй нарийн яриагүй”

Энхтөр: Ингэхэд таныг хэн гэдэг билээ, та шийдвэр гаргах эрх мэдэлтэй хүн үү?

Өөр Нэг Хүн: Энэ бол манай гэр бүлийн бизнес, намайг Одбаяр гэдэг. Би энэ хавийн асуудлыг шийдсээр ирсэн тийм л хүн. Би ерөнхий стратегийн, бодлогын шинж чанартай зүйлүүд дээр ороод явдаг, харин өдөр тутмын ажилд оролцдоггүй. Танай гадаа ирээд, өчнөөн зай байхад уурын зуухыг яагаад заавал танай хажууд барих болсныг гайхаж байна. Хүний хувийн орон зай руу орчихсон байна шүү дээ.

Түүнийг ажиглавал, нээрээ Содномзундуйн Эрдэнийн төрх байна.

Э. Одбаяр Байгалийн Түүхийн Музейг хамгаалж тэмцсэн нь. Баруун захад сууж буй.

Энэ залуу түүний хүү байх нь гэж бодсоныгоо “Та Эрдэнийн хүү юу?” гэж бататгавал, тэрээр “Тийм” гэлээ. “Тэр Хүний” үр садтай уулзсаныгаа “нохойн дуу” ойртлоо хэмээн сэтгэж, хэлэлцээр ямар ч хамааралгүй донгиодуу үгсийг би хэлсэн юм:

“Би Ардчилсан намд хэлбэрэлтгүй саналаа өгсөөр ирсэн хүн билээ. Танай аавын нам Сүхбаатарын талбайн хажууд “Ардчилалын Өргөөгөө” босгож чадаагүй нь санаа зовох зүйл биш. Учир нь, монгол өрхийн хувьд сайн-муу ялгалгүй орон сууц, байшин, гэр нь Ардчилалынх нь Өргөө. Энэ байшин бол “Миний Ардчилалын Өргөө” юм. Монгол өрх бүр өөрийн өмчтэй болсон нь “Ардчилалын” гавъяа, танай аавын оролцоо үүнд бий.”

Хаа очиж Содномзундуйн Эрдэнэнийн Одбаяр ажил хэрэгч асуулт асууж, намайг “буцаан авчирсан” юм.

Э. Одбаяр: Байшингаа хэд гэж байгаа вэ?

Энхтөр: XYZ сая, хоёр байшин хоёр айлын газартайгаа. 300 гаруй кв.м сууц шүү дээ гээд сууцаа үзүүлэв.  

Э. Одбаяр: Наана, цаана ярих уу?

Энхтөр: Үгүй (хоёр-гурван үндэслэл ярив)

Э. Одбаяр: Наад чинь багагүй мөнгө шүү дээ. Эдийн засаг, мөнгө төгрөгний байдал ямар байгааг та мэдэж байгаа шүү дээ. Бартер юм оролцуулах уу?

Энхтөр: Би таныг ойлгож байна, болох талаас нь ярилцъя. Танд бартерт санал оруулах ямар хөрөнгө байгаа вэ? Хэдэн хувьд нь бартерт оруулах вэ? Үнэндээ надад байшингаа зарах тулсан шаардлага үгүй, та нарыг шахах ч эвгүй байна. Хэрэв танд танай Ашиг Сонирхолыг илүү хангах тийм санал байгаа бол би сонсохыг хүсч байна…

Э. Одбаяр: Танайд ч ашигтай, манайд ашигтайгаар шийдье. Бидэнд бичиг баримт нь гарсан, гараагүй юмнууд бий. Тэднийгээ үзээд хариу өгье.

Бид ойлголцох шиг болов. Яриа хэлэлцээрийг ойлголцол, харилцан хүндлэл байлгахыг эрхэмлэсэн нь талаар өнгөрсөнгүй болтой. Бидний яриа сөргөлдөөн, хэрүүл маргаан болсонгүй өдий хүрлээ.

Гэнэтийн энэ уулзалтад би бодол санаагаа цэгцэлж амжаагүй ч надад бэлтгэл ажлын хүрээнд хийсэн “Ашиг Сонирхолын карт” байсан учраас ерөнхий чиглэлээ барьсаар байлаа. Би “Танай бизнес ашиг сонирхол заавал хангахдах ёстой”, “Танайх тэлэлтийн бодлого баримталж буй энэ үед, асуудлыг тэлэлтийнхээ хүрээнд авч үзээрэй”  гэх зэргээр түүний талд орсоор байв.

Содномзундуйн Эрдэнийн Хандгайт дахь тэлэлт

30 хором хүрэхгүй үргэлжилсэн энэ уулзалтаас би өөр хэд хэдэн зүйл ойлгосныг энд нуршилгүй орхиё.

Дараачийн пост

Э. Одбаяртай хийсэн хоёрдахь уулзалтыг оруулна. Тэрхүү уулзалтын дараа энэ хэлэлцээр бүхэлдээ, бүр тэр чигтээ буруу голдрилд орсоныг би ойлгосон юм. Дараачийн постоос хэлэлцээр хаашаа ч эргэж болдог, хэлэлцэгч алдаа гаргадгийг та үзнэ. Алдааны суурь энэ уулзалтаас эхтэй гэж би бодов. Та алдааг олоорой.

Арга зүй:

Хэлэлцээрийн зарчмуудыг сахиж, үзэл санааг өдөр тутмын амьдралдаа хэрэгжүүлснээр хэлэлцээрийн урлагт суралцдаг. Хэлэлцээр нь ажиглан хардаг үзмэр биш харин өөрийн биеэр оролцдог үйл явц юм. Ийм учраас эрхэм уншигч та, eduCase-д оруулсан нөхцөл, үйл явдлуудыг өөрийнхээрээ дүгнэж, “Хэрэв би байсан бол …” гэж эргэцүүлэн бодоорой, бодол санаагаа надтай хуваалцаарай (Facebook, Twitter). Энэ нь таны дасгал болог.

Сэтгэл хөдлөлд үл автах – эн тэргүүнд өөрийгээ төвшитгө. Талуудын ашиг сонирхолыг ойлгохыг эрмэлзэх.

Зэрэгцээд суу. Сонс. Хамааралгүй дэмий юм бүү ярь. Бүү буруутга, бүү довтол. Нөгөө талын ашиг сонирхолыг дээдэл, өөрийнхийгээ бүү март. Сонор сэрэмжтэй бай. Яаран дүгнэлт хийх шаардлагүй.

Би харилцан хүндлэл, ойлголцол, хэлэлцээрийн соёлыг сурталдаж байгаа юм. Тустай гэж үзвэл, Та үүнийг share-лээрэй

34 thoughts on “Уулзалт 2. Содномзундуйн Эрдэнэд нэг алхам ойртов.”

Leave a Comment